Многумина ракометари на РК Вардар последниве месеци зборуваа во медиумите за тешката состојба, неисплатените плати и последиците од тоа кај европскиот шампион. Последен е Кристијан Дисингер, кој иако во слична состојба како и сите други, има и убави зборови за спортскиот миленик на Македонија.

– Ако беа во ред финансиите, Вардар ќе беше перфектен клуб за секој ракометар. Нема друг клуб со ваква инфраструктура. Имате се на едно место, а имате и одлични луѓе кои работат со вас. Покрај тоа Македонците се луди по ракомет, тоа е прв спорт во државата. Иако Македонија има само два милиони жители, имате впечаток дека има 10 милиони луѓе, кога станува збор за ракометните настани – вели германскиот бек.

Дисингер ги демантира гласините дека ќе го напушти клубот, на што има потполно право, и вели ќе остане сигурно до крајот на сезонава. Инаку клубот на своите ракометари им должи многу плати.

– Во медиумите се пишуваше дека ќе си одам. Финансиската ситуација во клубот е лоша, но се договорив со раководството да останам до крајот на сезонава. Имав неколку понуди да заминам во последните денови од преодниот рок. Но во моментов сум повреден и не сакав да го напуштам клубот во таква ситуација – вели Дисингер.

Сепак по крајот на сезонава Германецот ќе си оди бидејќи не се живее од слава и љубов, туку мора да се заработат и пари.

– Морам да си заминам иако не го сакам тоа. Сакам да се посветам потполно на ракометот, а не да мислам дали ќе има плата. Со семејството и со соиграчите зборуваме со часови за овие проблеми. Добив и бели влакна во косата. Најверојатно ќе си заминам на лето. Се уште не сум потполно фит. Имав разговори со некои клубови, но ништо конкретно. Сакам да бидам комплетно здрав, пред да донесам одлука. Ќе почекам уште неколку недели, можеби ситуацијата овде ќе биде подобра – вели Дисингер, кој моментно закрепнува од повреда. Тој во Вардар дојде пред две години. Игра на позицијата лев бек.