После заминувањата на Даинис Криштопанс и Павел Атман, Вардар ќе биде ослабен на бековската позиција, но веднаш беа пополнети нивните места за денешниот натпревар против украинскиот клуб во Лигата на шампионите.

Тренерот Алушовски вели дека и покрај тоа што си заминаа двајца играчи, не се сомнева дека играчите кои ги има на располагање ќе го дадат максимумот во обид за позитивен резултат и конечно биде прекината серијата од пет мечеви без победа во ЛШ.

Македонскиот и европски ракометен шампион е свесен за големата задача која ја има пред себе, со триумф над Мотор Запорожје (17.30 часот, СЦ „Јане Сандански“ – Скопје) ќе биде чекор поблиску до пласман во осминафиналето. Судии на денешниот дуел се Литванците Ваидас Мазеика и Миндаугас Гателис.

Новото засилување Де Толедо конечно после долгата пауза поради повреда ги имаше своите први официјални настапи за „црвено-црните“, па останува да се види колку овој играч, односно десен бек, е подготвен да придонесе во овие важни и тешки моменти за Вардар.

Во составот на новиот тренер Стевче Алушовски повторно се наоѓаат Мартин Карапалевски, Дејан Кукуловски кои почесто ја „греат“ клупата, без Кугис, но е повикан нов голман, Васил Гогов.

Составот на Вардар за дуелот против Мотор Запорожје: Гогов, Кизиќ, Гедбан, Стоилов, Кукуловски, Димитриоски, Карапалевски, Сикошек Пелко, Скубе, Калараш, Чупиќ, Де Толедо, Дибиров, Горбок, Шишкарев, Горпишин.

Лига на шампиони, 12. коло

Кил-Веспрем 29:28

Денеска –
15.00 часот Келце-Порто
17.15 часот Монпеље-Мешков Брест
17.30 часот Вардар-Мотор Запорожје

Табела:

1.Кил 20 бодови
2.Веспрем 16
3.Монпеље 13
4.Келце 12
5.Порто 10
6.Вардар 9
—
7.Мешков Брест 6
8.Мотор Запорожје 4