Во финалето гледавме една навистина одлична кошарка со одлични напади и одбрани во текот на мечот, на крајот московскиот гигант се закити со трофејот.

Уште на самиот старт ЦСКА стекна двоцифрена предност од 29:17, а во втората четвртина беше и +14 разлика (34:20), но потоа полека се „будеа“ играчите на Анадолу.

Ја зацврстија одбраната, нападот започна да функционира, а позитивата на Армејците се стопи на само два поени (44:42), резултат со кој се замина на одмор.

Турците дури и поведоа на стартот од второто полувреме, но потоа следуваше нова доминација на Русите, сега нивната одбрана беше фантастична, мајсториски ги решаваа сите ситуации во нападите и повторно стекнаа позитива од +14, на семафорот стоеше 68:54.

Ефес со сите сили се обидуваше да се врати во игра, првата „виолина“ Ларкин погодуваше кога беше најпотребно, следуваше серија од 8:0.

Сепак, немаа доволно сили за целосен пресврт, едноставно ЦСКА беше премногу искусна да дозволи да загуби добиен меч, иако великанот од Истанбул беше константно блиску.

На крајот ЦСКА дојде до победата и осма титула шампион на Европа, а први стрелци во триумфот беа Кори Хигинс и Вил Клајбурн со по 20 поени. Токму Клајбурн по завршувањето на натпреварот беше прогласен за најкорисен играч, МВП на Ф4 турнирот.

??@Da_Thrill21 picks up his MVP award!

What a weekend he had!#F4GLORY pic.twitter.com/SYRDeGn1kh

— Turkish Airlines EuroLeague (@EuroLeague) May 19, 2019

На спротивната страна за турскиот претставник Шејн Ларкин повторно блесна овојпат со постигнати 29 поени.

Ова е вкупно осми трофеј во Евролигата за ЦСКА Москва, и понатаму останува Реал Мадрид со најмногу титули на вечната листа (10).