Човекот кој го откри Роналдо: Имав проблеми во Португалија бидејќи го споредив со две фудбалски божества

Ласло Болоњи открива како му даде шанса на Кристијано Роналдо во првиот тим на Спортинг и што виде во него.

Кристијано Роналдо уште како тинејџер влезе во сениорскиот фудбал и тоа во дресот на Спортинг Лисабон. Прв негов тренер во сениорска конкуренција му беше славниот романски фудбалер, репрезентативец, селектор и тренер, Ласло Болоњи кој за „Марка“ се потсетува на работата со тогаш екстра талентираниот Роналдо.

– Ја следев младата екипа и му реков да дојде да тренира со првиот тим бидејќи имаше добри физички предиспозиции, беше многу брз и одличен техничар. Кога го видов во акција, одлучив дека Роналдо нема да се враќа во младинскиот тим. Во соблекувалната постојано беше насмеан и се шегуваше, но на теренот беше фантастичен. Имаше стабилност и искуство какво што не е нормално за некое 17-годишно момче – започнува да раскажува Болоњи за Кристијано Роналдо.

Болоњи во првиот тим го приклучи Роналдо и му ја довери позиција на напаѓач, но малку подоцна го тргна од таа позиција и го постави на крило од каде Португалецот го покори фудбалскиот свет.

– На почетокот играше како класична „деветка“, но го преместив на крилната позиција бидејќи беше млад и лесен со околу 60. килограми, па ќе му беше многу тешко да игра со стопери и дефанзивци од 100 килограми. Со својата брзина и фантастичниот дриблинг, беше поефикасен на крилната позиција. Му беше тешко на почетокот, бидејќи најважни за него беа дриблинзите. Мојата задача беше да му објаснам дека е важно да исфрли од игра еден или двајца противници, а не сите пет. Со тек на времето и со помош на неговата интелигенција, Роналдо го пронајде вистинскиот пат – додава Болоњи кој смета дека ја направил вистинската работа бидејќи и менаџерот на Манчестер јунајтед, сер Алекс Фергусон, го форсираше на таа позиција.

– Сега е поинаков играч, оди во нападот, но кај Фергусон токму как крило ја освои првата Златна топка во 2008 година. Се сеќавам дека ме повика на церемонијата и ми се заблагодари. Тоа беше фантастично.

Колку славниот Романец веруваше во квалитетите најдобро ги отсликуваат неговите зборови кога прави споредба со двете најголеми фудбалски легенди во Португалија, Луис Фиго и Еузебио.

– За мене неговите успеси не се изненадување. Не знаев дека ќе биде најдобар во историјата, но уште тогаш во интервјуата велев дека ќе го надмине Фиго, па дури и Еузебио. Имав проблеми воПортугалија поради тие зборови бидејќи за нив имаше само два фудбалски бога, а јас ги споредив со едно младо момче. Сепак, Роналдо покажа дека бев во право.

Видео на денот