Цените на нафтата скокнаа на највисоко ниво во последните 13 години, рушејќи ги европските берзи
Цените на акциите на Европските берзи паднаа по веста дека САД и европските сојузници размислуваат за забрана за увоз на руска нафта, зголемување на цената на нафтата на највисоките нивоа во последните 13 години и закана за глобална стагнација – периоди на висока инфлација и ниски стапки на раст.
Паневропскиот индекс Stoxx 600 остро падна за 3,6 отсто . Најмногу падна банкарскиот сектор, во просек за 7,6 отсто, а најголем раст бележи секторот основни ресурси (нафта и гас) од 2,6 отсто.
Истовремено, лондонскиот Ftse индекс потона за 2,52 отсто, на 6.811 поени, франкфуртски DAX 4,98 отсто на 12.442 поени, париски CAC 4,44 отсто на 5.792 поени, а италијанскиот FTSE MIB 5,57 отсто, на 21.212 поени.
Минатата недела, цените на нафтата скокнаа за 7 отсто, на највисокото ниво од март 2020 година и продолжија во понеделник наутро со понатамошен силен пораст.
Американските и европските партнери размислуваат за забрана за увоз на руска нафта, изјави во неделата американскиот државен секретар Антони Блинкен. И покрај тоа што се нагласува важноста на стабилноста на глобалното снабдување со нафта, цените на барелот дополнително нагло пораснаа утринава , откако скокнаа за повеќе од 20 отсто минатата недела и го достигнаа своето највисоко ниво во повеќе од 10 години.
На лондонскиот пазар цената на барелот утринава порасна за повеќе од 8,5 отсто, на 128,30 долари, а во еден момент достигна и 130 долари, додека на американскиот пазар цената на барелот порасна за 7,7 отсто на 124,60 долари.
Ваквиот потег може да предизвика стагфлација во глобалната економија, период на бавен економски раст и висока невработеност, придружена со силна инфлација.
Имено, скокот на цените на енергијата ќе делува како дополнителен данок за потрошувачите, велат аналитичарите, а тоа може да ја намали потрошувачката на домаќинствата и да му наштети на растот на светската економија.
„Ако Западот го прекине најголемиот дел од рускиот извоз на енергија, тоа би било голем удар за светските пазари. Загубата од 5 милиони барели нафта на Русија може да ја зголеми цената на барелот до 200 долари и да го намали растот на глобалната економија “, објаснуваат економистите.
Русија во меѓувреме продолжи да ги напаѓа украинските градови и се обидува да го опколи главниот град Киев.
И на азиските берзи, цените на акциите нагло паднаа во понеделник, бидејќи руските воени напади врз украинските градови продолжуваат, а стравувањата од нарушување на испораката на нафта од Русија се зголемуваат.
Токискиот индекс Никеи падна за 2,94 отсто во понеделникот, на 25.221 поен.
