Високо позиционирана британска дипломатка во САД даде оставка поради односот на британската влада со Брегзит, велејќи дека не може повеќе да ги пропагира „полувистините“ на политичките лидери на кои повеќе не им верува, пренесува Си-Ен-Ен.

Александра Хол, главната дипломатка за Брегзит во британската амбасада во Вашингтон, во своите писмо за оставка напиша дека е „згрозена“ од барањата во јавноста да претставува информации за Брегизт кои не се „потполно искрени“, пишува американскиот медиум.

Немањето волја на британските челници искрено да ја информираат јавноста за Брегизт, вели Хол, ја намалила веродостојноста на британските дипломати во странство. Во писмото предадено на 3 декември таа пишува дека поради тоа нејзината позиција станала „особено неподнослива“ и „професионално неодржлива“.

Хол додала дека нејзината оставка нема никаква врска со тоа дали лично е „за или против Брегизт“, туку поради фрустрациите со начинот на спроведување на политиката.