Брестовац: „Шкрипи“ нападот, имаме слаба реализација!
Стратегот на македонската национална селекција вели дека само победа е во мислите на неговите најдобри ракометари на последниот натпревар во Виена.
Пред почетокот на Европското првенство, селекторот Данило Брестовац повеќе забелешки имаше кон одбраната, но сега после двете кола во групата „Б“, нападот не функционира најдобро.
– Подготовката е иста, одиме на победа, поразот со Чешка веќе е архивиран, и сите сме насочени што подобро да се подготвиме за следниот натпревар. Имаме време, имаме можности, имаме квалитетни одбранбени играчи, кои, иако стравуваме на почетокот на првенството дека одбраната ќе ни биде проблем, но и јас сум тој што повеќе посветува внимание на одбраната и повеќе состаноци имаме со нив, можам да кажам дека повеќе ми „шкрипи” во нападот, отколку во одбраната. Повеќе ни „шкрипи“ во таа одбрана „6 на 5“, имаме помала креативност на самите играчи, имаме слаба реализација, имаме слаба поставеност – рече Брестовац.
Претходно вакви проблеми немала Македонија, стратегот на „црвено-жолтите“ дека нема доволно време да се променат нештата, но нема намера да се откаже од позитивен резултат на дуелот во вторник против Австријците.
– Сепак имаме уште еден меч, имаме сила, имаме можност, имаме играчи, имаме уште двајца играчи кои можат да влезат во ротација. Мишевски е во одбрана, Танковски е во напад, може да биде корисен. Кратко е ЕП за да можеме да најдеме уште еден млад играч кој би бил четврти играч за таа ротација Талески и Кузмановски, доколку не им тргне – додаде Брестовац.