Бугарските политичари со ветото на евроинтеграцијата на Македонија ѝ нанесоа најмногу штета на самата Бугарија и очекувано е тоа да почнат да го сфаќаат, оценува аналитичарот Мерсел Биљали по последните изјави на бугарската министерка за надворешни работи Екатерина Захариева која за една недела неколку пати повика на пријателство и нормализација на односите меѓу двете земји, а завчера рече дека наскоро ќе ни донираат вакцини против коронавирусот.

Според Биљали промените во бугарската политика ќе се случуваат одвантре, во самото бугарско општество.

– Полека сфаќаат дека самата бугарска политика длабоко ги рани бугарските интереси со блокадата за Македонија на патот кон ЕУ. Очекувано е дека до изборите и натаму ќе се одржува максимално наелектризирана атмосфера за оваа тема во Бугарија, но ќе има промени. Една длабока логична анализа за долгорочните национални интереси недвосмислено покажува дека бугарската политика им нанесе најтешки последици. Тоа полека се сфаќа и во политиката и меѓу граѓаните. Видни луѓе од академската заедница, од културата, дипломатијата итн. се повеќе укажуваат на овие последици и на тоа како во европските кругови се гледа на бугарската политика кон Македонија – вели Биљали за „Слободен печат“.

Тој додава дека промената во Бугарија не е резултат на никакви притисоци од ЕУ, затоа што „ЕУ моментно има толку проблеми што интеграцијата на Западен Балкан им е практично неважна“.