Македонската машка одбојкарска репрезентација се подготвува за четвртиот натпревар во Европската сребрена лига во кој целта ќе биде да им се врати на победите.

После болниот пораз во СЦ „Борис Трајковски“ во Скопје (1:3), избраниците на Ратко Павличевиќ во Тирана в сабота со почеток од 19.00 часот ќе се обидат да ја поправат сликата на возвратниот дуел со Албанија.

На табелата во групата „Б“ води Романија со осум бодови, пред Македонија и Албанија кои имаат по четири, а на последната позиција е Босна и Херцеговина со четири.

На утрешниот меч Македонија ќе има целосно нова примачка дијагонала, затоа што Владо Милев воопшто не допатува во Албанија поради повреда. Ова значи дека Стојан Илиев и Лука Костиќ ќе добијат шанса да настапат во клучниот меч против Албанците.

За разлика од Милев за кој се очекува да се врати во репрезентацијата веќе за натпреварот со Романија на 8 јуни, јасно е дека либерото Костадин Ричлиев нема да може да го облече националниот дрес до крајот на Евролигата, па Васе Михаилов треба да помогне нашиот прием да биде подобар.