Баскет репрезентацијата на Србија ја заврши групната фаза на Олимпискиот турнир во голем стил со максимални седум победи.

Капитенот Душан Домовиќ-Булут и соиграчите во последниот натпревар од групата ја совладаа селекцијата на Рускиот Олимписки комитет со 21:10.

Србите поведоа со 3:0 и многу брзо стекнаа недостижна предност од 11:5. Со рутинска игра мечот го одработија до самиот крај за потврда на победата.

Васиќ беше најефикасен со осум поени, Ратко и Домовиќ-Булут реализира по пет, а Мајсторовиќ три.

Србија уште во текот на вчерашниот ден го обезбеди првото место за автоматски пласман во полуфиналето. Кој ќе биде противник на српските баскетџии во борбата за финале ќе биде познат после четвртфиналните дуели во кои се сретнуваат репрезентациите од третото до шестото место на табелата.

Според програмата Србија во полуфиналето ќе игра со подобриот од пресметката Холандија – Руски Олимписки комитет, а Белгија го чека победникот од мечот Летонија – Јапонија. Полска и Кина испаднаа од натпреварувањето.