Барселона и Баерн Минхен си закажаа четвртфинален дуел во Лисабон (ВИДЕО)
Шпанскиот и германскиот тим се последни четвртфиналисти во Лигата на шампионите.
Екипите на Барселона и на Баерн Минхен се последните четвртфиналисти во Лигата на шампионите откако остварија убедливи победи во реавншите против Наполи, односно Челси.
Каталонците на „Камп Ноу“ славеа со 3:1, додека Баерн беше уште поубедлив и победи со 4:1 против десеткуваниот Челси. Македонскиот репрезентативец Елиф Елмас доби шанса да заигра во финишот од натпреварот, тој влезе во игра во 79. минута на местото на Фабијан Руиз.
Токму Барселона и Баерн Минхен ќе играат меѓу себе во четвртфиналето од ЛШ чија завршница ќе биде во Лисабон.
Барселона одигра фуриозно прво полувреме во кое ги постигна сите три гола и остана во игра за освојување на највредниот фудбалски трофеј. Гол серијата ја отвори дефанзивецот Клемен Ленгле во 10. минута откако најдобро се снајде во шеснаесетникот на Наполи.
Лионел Меси во 23. минута зголеми на 2:0, а Луис Суарез со голот од пенал во 45. минута ги разречи сите дилеми околу победникот. Наполи во судиското продолжение од првиот дел успеа да намали на 3:1 преку Инсиње исто така од пенал. Во второто полувреме, каталонците му ја препуштија иницијативата на Наполи кој не успеа да пронајде начин да дојде до позиција да го загрози голот на Тер Штеген.
Баерн Минхен славеше уште поубедливо против Челси иако патникот во четвртфиналето беше познат уште по првиот натпревар кога германскиот тим во Лондон победи со 3:0.
Роберт Левандовски повторно немаше милост за противничките голмани и два пати го совлада Вили Кабаљеро, во 10. минута од пенал и во 84. минута. Во листата на стрелци се запишаа уште и Иван Перишиќ и Корентин Толисо, додека почесниот гол за Челси беше дело на Теми Абрахам во 44. минута.
Со одигрувањето на овие два натпревари познати се сите четвртфиналисти кои во Лисабон за завршниот турнир ќе се борат за трофејот. Четвртфиналните пресметки започнуваат на 12. август кога играат Аталанта и ПСЖ, наредниот ден ќе се сретнат Лајпциг и Атлетико Мадрид, на 14. август е дербито помеѓу Барселона и Баерн Минхен, додека последната четвртфинална двојка ја сочинуваат Манчестер сити и Олимпик Лион.
