Нико Ковач, сепак, на крајот ќе го плати цехот на раната елиминација во Лигата на шампионите, и по завршување на сезоната ќе добие отказ. Според каталонскиот весник,„Мундо Депортиво“, негов наследник најверојатно ќе биде поранешниот шпански селектор и тренер на Реал Мадрид, Хулен Лопетеги.

Според „Мундо Депортиво“, директорот на Баерн, Хасан Салихамиџиќ, веќе остварил средба со Лопетеги, и тоа во Мадрид, каде разговарале за евентуалната соработка.

Лопетеги е без ангажман од октомври минатата година кога поради слаби резултати доби отказ од Реал Мадрид. Неколку месеци порано, пред стартот на Светското првество во Русија, токму поради договорот со Реал Мадрид, беше сменет од селекторската функција во Шпанија.

Сепак, германските медиуми, фаворизираат уште едно име, Ерик Тен Хаг кој со Ајакс е вистински хит во Европа. Екипата се наоѓа пред пласман во финалето на ЛШ, а големи заслуги за тоа има токму Тен Хаг. Холанѓанецот има работено во Баерн Минхен, како тренер на Б тимот на Баерн Минхен од 2013 до 2015 година.