Пациенти на дијализа од Скопје се револтирани зашто од понеделникот се променил режимот на превоз, односно наместо до Центарот за дијализа Диаверум во Скопје да бидат превезувани со такси, како што било дотогаш – почнале да ги носат со комбе. Тоа според нив придонело наместо веднаш по дијализата да отидат дома и да се одморат, тие да имаат како што велат, „панорамско разгледување на Скопје“, чекајќи комбето да го изврти цел град, оставајќи ги другите пациенти и дијализата за нив се претвора во целодневна активност.

Денеска во 11 часот тие ќе одат да побараат средба во Министерството за здравство, кај народниот правобранител, а и претставка ќе поднесат до Комисијата за спречување корупција.

– Како прво комбињата се високи. Ни ставаат столче за да се качиме. Нема каде да се фатиш да се качиш. Жени и мажи во колички 80- годишни се возат внатре. Одиме по четири ипол часа да правиме дијализа, од дома излегов во 14 часот, а се вратив во 20 часот, затоа што комбето го вртеше цел Аеродром да ги остави пациентите што беа со мене во комбето дома. Се случува по завршувањето на нашата дијализа, да чекаме другите пациенти да се исклучат од нивната. После дијализа ние треба во најкраток временски период да се вратиме дома и да легнеме, а не да го шетаме градот и да имаме панорамско разгледување на Скопје додека да дојдеме дома, вели за „Слободен печат“ Силвана Костиќ од Скопје, која е дијализен пациент 22 години.

За проблемите на пациентите на дијализа слушнете го и аудио записот:

Таа додава дека пациентите имаат намера да викнат телевизии да снимаат кога пациентите ќе излезат од дијализа.

– Да видите на што личат, како да се враќаат од боиште. И замислете, вчера сестрата во собата ми постави ултиматум, или сама да си најдам превоз, или година дена да не можам да се возам со нивниот превоз и да се возам со автобуска карта од 900 денари. Каква уцена е тоа?, револтирано прашува Костиќ.

Досега според неа, превозот бил со такси.

– Се беше во ред со такси. Не земаа на време и не враќаа дома во најкус можен рок. Но од понеделникот тоа се промени. Во договорот од Министерството за здравство стои дека концесионерот треба да ни обезбеди превоз исклучиво со такси и никаков друг импровиизран превоз. Ние сме во лошо здравје, едвај влегуваме во такси, а камоли во комбе, додава Костиќ.

Од Центарот за дијализа Диаверум за Слободен печат кратко изјавија дека компанијата што го врши превозот направила превид во еден ден и проблемот ќе биде надминат. Оттаму побараа писмени прашања за кои одговор ветија подоцна во текот на денот.

Друга пациентка која на дијализа е 15 години, Валентина Зориќ, за „Слободен печат“ вели дека до минатата недела превозот бил со такси.

– На почетокот сакаа да не возат со комбиња, но не префрлија со такси, културно и нормално откако се побунивме. Собравме потписи од пациентите кои бараат такси превоз на 4 листа, има луѓе кои им паѓаат притисокот и не може да се возат во комбиња. Здрав човек не може да го разбере тоа. Не сакаме лимузини, сакаме такси како и до сега, а не со комбиња во ек на пандемија да не шетаат. Ние не сме таму по сопствена желба. И од дијализниот центар кога видоа дека собирам потписи, на повозрасните пациенти им кажаа дека ќе има опција да им дадат пари да доаѓаат на дијализа со автобус трипати неделно. Тоа не е хумано, вели Зориќ.