Најдобриот тенисер на светот Новак Ѓоковиќ ја започна денеска 310 недела на првото место на АТП листата.

Српскиот тенисер така се израмни со Швајцарецот Рожер Федерер и следниот понеделник (8 март 2021 година) ќе постави рекорд по бројот на седмици на првата позиција на АТП листата.

Моментно на врвот Ѓоковиќ има 12.030 бодови, 2.180 повеќе од второпласираниот Рафаел Надал (Шпанија).

Овој рекорд и претходно можеше да биде урнат доколку пандемијата на коронавирусот не ја суспендираше АТП листата на 22 недели, но и покрај тоа Ноле ќе биде запишан како најдобар во историјата и оствари една од своите зацртани цели во кариерата.

Трет тенисер по вкупен број на недели на врвот на АТП е Пит Сампрас (286), следуваат Иван Лендл (270) и Џими Конорс (268), а Надал е шестопласиран со 209 седмици на врвот.