Македонија има политичка волја, но нема време да го промени Уставот до јуни за да ги внесе Бугарите како малцинство и така да го исполни главното барање на Софија за тргање на ветото за македонските преговори со ЕУ, но процедурата за уставни промени може да почне, оценува аналитичарот Петар Арсовски.

– Не ме плаши толку нивното барање за промена на Уставот, затоа што претодните барања за нашиот јазик и идентитет беа могу пострашни. Процедурата за промена на Уставот кај нас се одвива во три фази и доколку ние пред јуни ја поминеме првата фаза, во која се констатира дека има потреба од уставна промена, ќе покажеме доволно сериозност пред Бугарија и ЕУ дека ќе го исполниме тоа барање. Тоа би било таа гарација што од нас ја бара бугарскиот премиер Петков за да го тргне ветото од преговарачката рамка и во јуни да ги почнеме преговорите за членство со Унијата. Инаку, јасно е дека Бугарија може кога сака да не блокира и понатаму во текот на самите преговори – вели Арсовски за „Слободен печат“.

Тој додава дека големо прашање е што ќе се случува со останатите бугарски барања кон нас кои се однесуваат на македонскиот јазик и историја.

– Неизвесно е дали Софија ќе го истакне само барањето за бугарското малцинство во Уставот или ќе го приклучи и кон останатите пред да го тргне ветото. Но, во последно време, премиерот Петков зборова само за Уставот – вели Арсовски.

За уставни измени е потребно двотретинско мнозинство од 80 пратеници. Партиите од албанскиот блок се изјаснија дека би ги поддржале, а поддршка најавија и од најголемата македонска опозициска партија ВМРО-ДПМНЕ, но само доколку Бугарија за возврат го признае македонскиот народ, јазик и историја.

Бугарскиот премиер Кирил Петков завчера повтори дека Македонија прво треба да го смени Уставот за да се почитуваат правата на Бугарите, а потоа Софија ќе го тргне ветото од преговарачката рамка.