Алек Болдвин ќе биде обвинет за убиство од небрежност
Познатиот актер Алек Болдвин ќе биде обвинет за убиство од небрежност откако со истрел од филмски пиштол ја застрела Халина Хачинс, директорката на фотографијата на неговиот филм „Rust“.
Несреќата се случи на проба за време на снимањето на вестернот „Rust“ на ранч во близина на Санта Фе во октомври 2021 година.
Хана Гутиерез Рид, која била задолжената за оружјето за филмот, исто така, ќе биде обвинета за убиство од небрежност.
Денеска, на 19 јануари, окружната обвинителка во Санта Фе, Мери Кармак-Алтвис, објави во соопштение дека против нив ќе бидат покренати обвиненија до крајот на месецот, пренесува „Би-би-си“.
„Актерот и продуцент Алек Болдвин и Хана Гутиерез Рид ќе бидат обвинети за две точки од обвинението за убиство од небрежност“, се наведува во соопштението.
„По темелно разгледување на доказите, утврдив дека има доволно докази за обвинение“, рекла Кармак-Алтвис.
„Додека сум на оваа позиција, никој не е над законот и сите заслужуваат правда“, додала таа.
На Болдвин и Гутиерез Рид им се заканува казна од 18 месеци затвор и парична казна од 5.000 долари доколку бидат прогласени за виновни. Ним ќе им суди порота, соопштија обвинителите.
Во пукањето беше ранет и филмскиот режисер Џоел Соуза, но обвинителите соопштија дека нема да бидат покренати обвиненија во врска со тоа.
По пукањето, Болдвин рече дека пиштолот пукнал сам од себе. Тој додаде дека не го повлекол чкрапалото на пиштолот и дека не бил свесен дека е наполнет.
„Не знам што се случи на тој сет. Не знам како тој куршум стаса во тој пиштол. Не знам“, рече тој во декември 2021 година.
