Градоначалникот на Бутел Велимир Смилевски изјави дека добива закани „да не ја затвора општината“ за претстојниот верски празник Задушница, по најавите дека до крајот на неделава е можно да бидат прогласени локални карантини во деловите од земјата каде што има зголемен број новозаболени.

Бутел веќе неколку денови е меѓу првите пет општини по број на новозаболени и во моментов има 37 активни заразени со Ковид-19.

Тој вели дека знае од каде доаѓаат заканите, но не пријавил во полиција за да не ѝ одзема време. „Ако затворите за празникот, тешко вас“, му пишувале во пораки на Смилевски, проследени со пцости и навреди.

– Не ме загрижуваат заканите за мојата безбедност, но секако не сме рамнодушни во однос на носењето на одлуките. Сакаме да ги земеме предвид забелешките од сите. Од друга страна, на
сите ни е јасно дека за Задушница ризикот за ширење на заразата е голем, се носи храна, се прави групирање. Сметам дека треба да почекаме до четврток за одлука – вели градоначалникот Смилевски, кој е во самоизолација поради контакт со директорката на Управата за јавни приходи Сања Лукаревска, која е позитивна на коронавирус.