По уште еден, петти по ред протест „Србија против насилството“, кој се одржа во саботата, Александар Вучиќ во неделата на одбележувањето на Денот на полицијата повтори дека нема да ги исполни барањата. Пред се, дека нема да дозволи разрешување на министерката за полиција Братислава Гашиќ, објавија српските медиуми.

Потоа зборуваше за неговото убиство.

„Мислат дека ќе ми го скршат духот со закани дека ќе ме убијат? Дневно добивам по двесте вакви закани. Ајде, направето го веќе еднаш и олеснете ми“, рече Вучиќ, алудирајќи на куклата на обесениот претседател на Србија што се појави на протестот.

Неколку часа подоцна, како што објавија медиуми блиски до власта, била одржана средба меѓу Вучиќ и неговите најблиски соработници, на која тој наводно ги изговорил следните зборови:

„Немам проблем да умрам, подготвен сум да бидам убиен, но , никогаш и под никакви околности без борба, без избор, нема да се откажам од власта! Никогаш и под никакви околности нема да се согласам на уцени, никогаш нема да ја предадам власта на најлошите без избор. Никогаш нема да потпишам никаква техничка или преодна влада! Ако ме убијат, брат ми Андреј ќе остане. Ако го убијат брат ми, мојот син Данило ќе остане. Ако ми го убијат синот, ќерка ми Милица ќе остане. Ако и неа ја убијат, ќе остане син ми Вукан… И нашите гробови ќе се борат против усташите“.

Потпретседателката на Партијата за слобода и правда, Мариника Тепиќ, побара од соработниците и советниците на Вучиќ да го „вразумат“ или „спречат“ Вучиќ, во име на државата Србија да носи сериозни одлуки.

„Зборува за крвопролевањето на неговите деца: „Ако ме убијат ќе остане брат ми Андреј, ако го убијат Андреј ќе остане Данило, а ако го убијат Данило ќе остане ќерка ми Милица“. Не верувам во тоа што го читам, тој човек веќе не е способен да одлучува. Навистина апелирам до неговите пријатели, соработници и медиумски советници да расудуваат. Човек кој зборува за крвопролевањето на своите деца, во деновите кога Белград и Србија сè уште плачат за децата кои загинаа, целосно го изгубил својот разум, рече Тепиќ.

Сличен став има и претседателот на Демократската партија Зоран Лутовац. Тој за весникот „Нова“ изјави дека ваквата изјава на Вучиќ укажува на политичка дезориентација и страв од претстојните промени.

„Изјавата за некакво негово убиство, убиство на неговиот брат или децата има повеќе димензии. Ќе се осврнам на политичкото, иако мислам дека здравјето е најважно. Таа изјава укажува на политичка дезориентација, страв од претстојните промени,“ вели. Лутовац и додава:

„Притисокот е од сите страни: многу ветуваше на Западот, Москва, криминалците, сите тие ветувања ги одржа во рамнотежа, а сега се соочува со најсериозниот притисок, притисокот на граѓаните кој се заканува да го урне неговото политичка-криминална кула од карти. Оттука овие изјави, оттаму и оваа нервоза“.