Триесет и шестгодишна жена е најмладиот починат пациент од ковид во тетовската болница изминатото деноноќие. Во истата болница имало уште 9 лица кои починале изминатите 24 часа, информира раководителот на ковид-одделението доктор Гзим Нуредини за Слободен печат. Ниеден од починатите не бил вакциниран и сите биле со коморбидитети, односно придружни болести.

Бројот на амбулантски прегледи драстично расте во овој ковид-центар каде за преглед се јавиле дури 245 пациенти. Хоспитализирани се 120 лица и повеќето се на кислородна поддршка.

-Нема подобрување, многу пациенти бараат прием и преглед. Имаме 120 хоспитализирани, со прва доза се вакцинирани девет, а со втора три пациенти. Починати за жал имавме многу, десетмина и сите невакцинирани и со пропратни болести. Почина жена која беше донесена во многу тешка состојба при прием и почина во текот на приемот. Тоа е многу млада жена, под 40 години, ни рече доктор Нуредини.