„Bacstaí“ или „Boxty“ е омилениот појадок во Ирска – палачинки од компир, кои луѓето ги јадат со овошје, но и со колбасици и јајца, пишува „Пун куфер“.

Постојат повеќе варијации на овој ирски специјалитет. Овие палачинки се добра замена и за мексиканските тортиљи, но може да бидат послужени и како прилог за чорба.

Потребни состојки:

• 500 гр компир
• 1/2 лажичка сол
• 50 мл матеница
• 50 гр брашно
• 1 лажичка путер
• Сланина
• Кисела павлака

Подготовка:

Измијте ги компирите, изрендајте ги и ставете ги во крпа за да им ја исцедите водата. Потоа, оставете ја течноста во сад да отстои околу 20 минути, за скробот да се спушти на дното, а компирите распоредете ги на даска да се исушат.

Внимателно истурете ја водата од садот за да остане скробот кој паднал на дното, а потоа додадете ги компирите, солта и матеницата. Потоа, додадете го и брашното.

Растопете го путерот во мала тава, па додајте ја смесата од компири. Печете ја палачинката на тивок оган околу 10 до 15 минути, па превртете ја со помош на чинија. По потреба, додадете уште малку путер во тавата доколку сметате дека треба.

Исечете ја сланината на тенки парчиња и испржете ја во друга тава за да ви стане крцкава.

За крај, исечете ја палачинката на парчиња и сервирајте ја со крцкава сланина и кисела павлака. По желба, можете да додадете и мариниран кромид во оцет.