Денеска во Белград се отвора „Балкан текстил 2023“ – саем за текстил на кој ќе се претстават 53 компании од Турција, Кина, Португалија и Србија. Иако производството на текстил и облека имаше долга традиција и со години беше една од главните извозни гранки, состојбата денес е далеку од тие славни денови.

На прашањето што значат овие податоци и дали има шанси за домашната текстилна индустрија, ниту добрите познавачи на состојбите во Србија не се оптимисти. Милан Кнежевиќ, долгогодишен бизнисмен и сопственик на „Модус“, вели дека има многу проблеми и дека во сегашните услови во секторот Србија нема перспектива да го зголеми обемот на производството, пишува Политика.рс.

– Денеска на пазарот има само неколку големи производители кои се занимаваат со сериозно производство. Останатиот текстл се продава во бутици и други продавници, а доминираат странски брендови, најчесто со значителна поддршка од земјите од кои доаѓаат. Една таква компанија моментално зазема 15 отсто од српскиот пазар на средни квалитетни брендови – објаснува Кнежевиќ.

Според него, има голем број домашни производители кои имаат свои или обезбедени продавници за малопродажба, како „Мона“, „ПС мода“, „Легенда“, „Луна“.

-Да не го заборавиме огромното присуство на половни стоки со катастрофални еколошки последици. Западните земји на овој начин се ослободуваат од овој вид стоки бидејќи рециклирањето е многу скапо. Овие парчиња облека завршуваат на нашите битпазари и се продаваат за 100-200 динари по парче. А тоа значително ја намалува можноста за раст на продажбата во легалните продавници. Тука е и проблемот со продажбата на интернет, која е целосно надвор од контрола и зазема огромен дел од пазарот – вели Кнежевиќ.

Тука е и хроничниот недистиг на работна сила, па само во Белград, забележува Кнежевиќ, во моментов би можеле да се вработат 2.000 шивачки, но нема ниту една.