Паднаа во вода надежите на помалите партии дека наскоро во Македонија избори, наместо во шест, ќе има во една изборна единица. Владата даде негативно мислење за Предлог-законот за изменување и дополнување на Изборниот законик поднесен од: пратениците на ЛДП, Моника Зајкова и Боби Мојсоски, на ДС, Павле Трајанов, ДОМ, Маја Морачанин и Мирослав Богдановски, на Левица, Димитар Апасиев и Борислав Крмов, на ВМРО-НП, Љупчо Балкоски и на пратеникот од Коалицијата предводена од СДСМ, Панчо Минов.

Во него пишува дека во рамките на Министерството за правда веќе е формирана интердисциплинарна работна група составена од релевантни државни органи, претставници на науката, на ДИК, ДКСК, ДЗР, АВМУ, бројни претставници на НВО и претставници на неколку парламентарни политички партии која работи врз изработката на целосно нов Изборен законик.

Според текстот на мислењето доставено и потпишано од вицепремиерот Артан Груби, работата на работната група е поддржана и постојано набљудувана од страна на меѓународните организации кои активно го следат изборниот процес во државата изминатите дваесетина години (ИФЕС, ОБСЕ/ОДИХР, НДИ, ЕУ).

– Како процесот на усвојување на Изборниот законик, неминовно ја наметнува потребата од консензус на сите политички партии, по дефинирање на решенијата по однос на препораките на ОБСЕ/ОДИХР, планирана е поширока дебата на работната група со исти парламентарни политички партии, на која ќе се разгледа и предлогот за промена на изборниот модел, пишува во мислењето на Владата за Предлог-законот за една изборна едница.

Поради сето ова, Владата не дава позитивно мислење за предложениот текст на Предлогот на закон за изменување и дополнување на Изборниот законик поднесен од група пратеници и му предлага на Собранието да не го донесе законот.

– Истовремено, Владата смета дека е упатно доставениот предлог да биде разгледан од работната група за изработка на Изборниот законик, со цел истиот да биде предмет на поширока дискусија помеѓу струката и политиката, а конечниот предлог за измени на Изборниот законик, да биде резултат на сеопфатен инклузивен и консултативен процес, со цел гарантирање на правната сигурност, стои во мислењето.

Помалите партии предлагаат целата државна територија да се облекувала во една изборна единица со отсуство на изборен праг.

– Со тоа ќе им се овозможи и на помалите политички партии, како и на партиите на помалите етнички заедници, да го остварат своето право на претставување. Во актуелната поставеност на системот, нивните гласови се поделени во шест изборни единици и во ниту една од нив, тие не успеваат да соберат доволно за да добијат пратеник, пишува во Предлог-законот за една изборна единица.