Во Македонија има еден апсурд. Населениeто се намалува како поради негативниот природен прираст на населенито, така и поради отселувањето, но истовремено имаме зголемување на бројот на градбите, вклучително и на становите. Истовремено, продолжуваат и политиките на нерамномерен регионален развој.

На овие појави, во разговор за „Утрински печат“ посочи Дончо Герасимовски, поранешен директор на Државниот завод за статистика.

– Според Пописот од 2021 година има околу 840.000 станови. Но, имаме голем број на празни станови – некаде околу 308.000 се ненаселени, што е околу 37 отсто од вкупниот број на станови. Во околу 30-тина општини во државава половина од становите се ненаселени. Ова претежно се однесува на рурални општини каде има огромно раселување, затоа што имаме празнење на селските места – вели Герасимовски.

Тој вели дека според Пописот имаме 205 раселени места, тоа се всушност празни места и тоа се главно села.

– Ова е карактеристично за општините Штип, Радовиш, Валандово, а во последно место и во Кавадaрци. Притоа, често се случува населението да живее во градоците, а од пролет да доаѓа во селата, но имаме и раселено население кое заминало во други држави – вели Герсимовски.

Герасимовски вели дека околу 62 отсто од населението на Македонија живее во градовите. Како типичен пример ја споменува Општината Штип каде 18 населени места има целосно раселени, а 15-тина имаат по 10-тина жители. Така, вкупно 70 до 80 отсто е веќе преселено во градот.

– Раселувањето на населението доведува до градби во градовите, а тоа предизвика низа проблеми – вели Герасимовски.

Тој направи и споредба со Словенија од којашто може да се извлечат низа заклучоци за една територијална организација која оди во прилог на урбанистичката и популационата политика.

Целото ВИДЕО-ИНТЕРВЈУ погледајте го во продолжение: