Eкс-англискиот фудбалер Дени Марфи призна дека по завршувањето на кариерата како фудбалер се соочил со проблеми и станал зависник од кокаин.

Во разговорот на објавениот подакст, Марфи истакна дека барајќи замена за адреналинот на теренот еден вид утеха нашол во дрогата која му станала сериозен проблем.

„Кога престануваш со играњето фудбал, се појавуваат одредени проблеми. Додека сте фудбалер и секоја недела играте натпревари, чувствувате голема доза на адреналин, кога прекинав, барав некоја замена и таа ја пронајдов во кокаинот и марихуаната“, изјави Марфи.

За разлика од дрогата алкохолот не му претставувал проблем.

„Со алкохолот немав проблем, можев да не пијам дури и кога го имав дома, но без дрогата не можев“, изјави Марфи.

Во кариерата Марфи играше за Чарлтон, Тотенхем, Фулам и Ливерпул каде што имаше најголем клупски успех и освои шест титули.