ВИДЕО+ФОТО: Со среќа момци, срце на терен и борба до крај за Македонија!
Македонската фудбалска А репрезентација заминува за Тбилиси каде што утре од 18.00 часот против Грузија ќе го игра финалето од УЕФА Лигата на нации за пласман на наредното Европско првенство.
Избраниците на селекторот Игор Ангеловски се надеваат и веруваат дека конечно и ние ќе вкусиме учество на еден континентален собир со најдобрите селекции на Стариот континент.
– Од срце им посакувам на нашите фудбалери многу спортска среќа во финалето. Овој тим има карактер, сила и трпение. Верувам дека ќе имаме одличен настап и победа за историја. Среќата ги следи храбрите, покажете колку сме силни заедно – се зборовите на претседателот на Фудбалската федерација на Македонија (ФФМ), Муамед Сејдини.
Секако предводени „црвено-жолтите“ од еден од најискусните во тимот, Горан Пандев кој зад себе има големи натпревари со многу трофеи на клупски план.
Но „Гранде Пандев“ посакува својата кариера да ја заокружи и со пласман на Европско првенство со репрезентација, а дефинитивно пред него е една голема шанса да ја оствари и таа цел.
Доколку се пласираме на ЕП, ќе бидеме сместени во групата „Ц“ (Букурешт, Амстердам) со Холандија, Украина и Австрија.
– Ние сме една голема фамилија. Сигурен сум дека ќе дадеме максимум. Нѐ делат 90 минути од остварување на нашите соништа – вели нашиот капитен Пандев.