Во годината кога се означува еден век од раѓањето на великанот Блаже Конески, кој е најзаслужен за утврдување на македонскиот стандарден јазик, а со цел да се продолжи неговата мисија, издавачката куќа „Арс Ламина“ го реализираше амбициозниот проект – едиција „Македонски книжевни класици“.

„Редакцијата на „Арс Либрис“, дел од „Арс Ламина публикации“ се зафати со еден многу амбициозен проект на реактуелизирање, односно навраќање на важни творци и нивните дела со желба да се трхне прашината наталожена врз нивните книги и имиња и да се вкомпонираат во новиот контекст преку една иновативна постапка. Имено, во овој проект, издавачката куќа реши да ги вклучи блиските луѓе на овие автори, кои со својот ракопис, односно потпис ќе до дополнат и дососдадат новото лице на нивните дела.

Така на пример, делата на Петре М. Андреевски кои ги реиздадовме, а тоа е поголемиот дел од неговото поетско и прозно творештво, со свои илустрации го дополни и допиша уметницата Воскресија Андреевска, која е негова внука. Потоа, илустрации на кориците на двете дела од Димитар Солев се мотиви од слики на познатиот сликар и академик Васко Ташковски. Свои анегдоти поврзани со ликот и делото на Солев, во форма на поговори, напишаа научните работници Александар Прокопиев и Славчо Ковиловски.

Истиот принцип е применет и при преобјавувањето на делата на Живко Чинго, новото лице на книгите го создаде неговиот внук, уметникот Владо Буковски, а пак соработникот на Чинго, режисерот Бранислав Ставрев напиша опсежни осврти кон овие култни дела на македонската книжевност. А тука е и уметницата и дизајнерка, Искра Димитрова, внука на Ѓорѓи Абаџиев, се погрижи кратката проза „Пустина“ да ја направи поприемчива за новата генерација читатели, создавајќи еден визуелен симбол што сигурно ќе биде новата врска со овој автор. Впрочем целата идеја на оваа едиција беше да се вдахне нов живот на овие класици на македонската книжевност, така што конечно ќе се вратат на полиците на книжарниците, овојпат со нова енергија. Досега се објавени девет книги од творештвото на Петре М. Андреевски, стихозбирката „Скопјани“ од Гане Тодоровски, „Пасквелија и Нова Пасквелија“ и „Големата вода“ од Живко Чинго, „Пустина“ од Ѓорѓи Абаџиев и „Зора зад аголот“ и „Кратката пролет на Моно Самоников“ од Димитар Солев.