Австралиската сурферка Лаура Еневер постави светски рекорд за сурфање на најголемиот бран со кој некогаш сурфала жена. 31-годишната го скроти „ѕверот“ долг 13,3 метри во јануари во Оаху, на Хаваи. Таа го надмина претходниот рекорд кој траел седум години.

Рекордот на Еневер беше потврден од Гинисовата книга на рекорди во четвртокот на церемонијата во Нарабин, Сиднеј, пренесува Би-Би-Си.

Тоа предградие е местото каде што пораснала сурфајќи и ја започнала својата кариера на 11-годишна возраст. Таа победила на неколку јуниорски натпревари, а потоа станала редовна на Светската лига за сурфање (ВСЛ), каде учествувала седум години, пред да се префрли на поинтензивното сурфање.

„Пред да влезам знаев дека тоа ќе биде голем предизвик. Кога полетав погледнав надолу знаев дека дефинитивно е најголемиот бран што некогаш сум го сурфала. Знаев дека тоа е бранот на мојот живот“.

Нејзиното сурфање било снимено на видео, кое Гинисовата книга на рекорди ја искористи за да помогне да се потврди висината на бранот, заедно со детални информации за локацијата на видеографите и локацијата на бранот. Спортскиот шеф на ВСЛ, Џеси Мајли-Дајер, рече дека тоа е неверојатно достигнување.

„Лаура е бестрашна, посветена и вистинска инспирација, и јас сум толку горда што ја познавам“, рече таа.