Вардар со „лесен тренинг“ пред ЛШ, Пролет славеше над Металург

Т. Пролет ја освои Автокоманда и најавува дека ќе цели високо во новата ракометна сезона/Фото: rkprolet.mk

Денеска започна новата сезона во најсилното ракометно првенство во Македонија, еден од фаворитите за титулата Вардар 1961 имаше успешен старт со убедлива победа над Скопје 2020 со резултат 48:24.

„Црвено-црните“ победнички ќе влезат во новата сезона од Лигата на шампионите, следната седмица кога гостуваат во Норвешка кај Елверум.

На денешниот дуел најефикасни во победничките редови беа Дибиров и Талески со по седум голови, а еден помалку Георгиевски. На спротивната страна пет погодоци запиша Чакалиќ, а четири Василевски.

Т. Пролет триумфално ја стартуваше новата суперлигашка сезона откако славеше на гостувањето против Металург со 22:24.

Домаќините настапија без странските засилувања од летово, а Т. Пролет знаеше како да го искористи тоа и благодарение на цврстата одбрана успеа да стигне до победата.

Пејовиќ и Голубовиќ со по пет погодоци беа најефикасни во таборот на Т. Пролет, а во екипата од Автокоманда Хорват забележа седум голови, еден помалку Петров.

Во другите средби Охрид со 29:24 беше подобар од Тиквеш, Е. Пелистер со истиот резултат триумфираше над Е. Пелистер 2, потоа скопски Бутел минимално со 28:27 го совлада Прилеп, а Струга како гостин го надигра Радовиш (19:22).

Видео на денот