Вардар против Металург во финалето на Купот
Екипите на Вардар и Металург ќе играат во финалето на ракометниот Куп на Македонија.
Бранителот на трофејот, Вардар, во полуфиналето од Купот, го совлада најголемиот ривал сезонава, Еурофарм Работник со 35:30.
Тимот од Битола, беше конкурентен во првиот дел кој го загуби со 16:18 и во првите пет минути од вториот дел, пред вардарци да го засилат ритамот. „Црвено-црните“во 40 минута, за прв пат поведоа со три гола разлика (24:21), и во наредните седум минути му дозволија на Еурофарм Работник да постигне само два гола (27:23) и потоа рутински до крајот ја одржуваа предноста.
Најефикасни во редовите на Вардар беа, Рожерио Мораеш, Стаж Скубе и Тимур Дибиров со по седум постигнати голови, додека Владислав Остроушко со 10 голови беше најефикасен кај Еурофарм Работник.