Ракометарите на Вардар вечерва  (18 ч.) му гостува на добро познатиот ривал во рамките на осмото коло од Лигата на шампионите. Противник на Вардар е полскиот Киелце кој минатата недела успеа да остане непоразен во Скопје (28:28).

Полскиот тим претставува вистинска ноќна мора за вардарци кога играат на гости, во досегашните четири пресметки во ЛШ, Киелце пред своите гледачи оствари четири победи над Вардар (31:27, 27:24, 23:20 и 33:31).

Дополнителен проблем за тренерот Едуард Кокшаров освен традицијата претставуваат и проблемите со повредените играчи. Криштопанс не отпатува со екипата за Полска, од поодамна се повредени Горбок и Толедо, додекас Дисингер се повреди на дуелот со Мотор во СЕХА лигата, со што Вардар остана речиси без бекови.  Дисингер и Атман ќе бидат во тимот денеска но прашање е дали ќе настапат.

– Ние нема да запреме без разлика на составот. Ако треба ќе играме и со голмани на бековската позиција, важно е да победуваме – вели тренерот Кокшаров.