По редицата написи во швајцарските медиуми дека болниците се полни со пациенти-Албанци кои се вратиле од летните одмори во родните краишта, како и наводите за фалсификување ПЦР тестови во Србија, Косово и други балкански земји, повеќе организации, интелектуалци, па и имамот од џамија во швајцарскиот главен град Берн, се вклучија во апелите кон албанската заедница за вакцинација.

Според швајцарскиот весник на албански јазик Ле Кантон 27, бројот на новозаразени и смртни случаи од ковид-19 во Швајцарија е алармантен, а повеќе од 500 жртви на вирусот досега биле од албанската заедница, како и 25.000 заразени, главно од Косово.

Во Швајцарија од почетокот на пандемијата се забележани вкупно околу 11.000 смртни случаи од ковид-19. Според податоци од членови на албанската заедница, болници, лекари-Албанци и погребни компании кои ги пренесува весникот, вакцинирани се околу 30 отсто од 60.000 луѓе од албанско потекло, колку што живеат во земјата.

„Моето семејство и јас, заедно со луѓето во џамијата, бевме меѓу првите што позитивно одговорија на повиците за вакцинација, затоа што тоа е во најдобар интерес на нашето здравје, нашите семејства, на кантонот и пошироко во општеството. Во исто време, во нашата средина ние ги поттикнуваме, апелираме и повикуваме не само до нашите верници, туку и до целата албанска заедница да се вакцинира и да ги почитува мерките и правилата на Швајцарската влада околу овие обврски. Затоа, јас ги повикувам сите граѓани да ги остават настрана теориите на заговор со разни шпекулации за вакцините и да се вакцинираат што побрзо, наспроти пропагандите на разни сајбер-армии“. Ова е потребно и превентивно, затоа што Исламот е религија на превентивата, да се спречи најлошото. Вакцината не е само халал, туку исто така и еден хуман, нужен чин на нашето време“, вели за весникот Ле Кантон 27 имамот на албанската џамија во Берн, Мустафа Мемети.