Европскиот шампион Баерн Минхен и победникот во Лигата на Европа, Севиља, треба да играат меѓу себе на 24. септември во Будимпешта, а според плановите на УЕФА, Суперкупот требаше да биде првиот натпревар кој ќе се игра пред ограничен број на гледачи. Меѓутоа, Унгарија денеска и официјално го затвори границите за странски државјани за да се спречи ширењето на коронавирусот и таа одлука и задава главоболки на УЕФА.

„УЕФА соработува со фудбалската федерација на Унгарија како и со унгарската влада околу воведувањето на мерки со кои ќе се гарантира здравјето на сите кои ќе присуствуваат и ќе играат на Суперкупот. Потребните документи за влез во Унгарија за различни групи (играчи, официјални лица, партнери, персонал, новинари, навивачи…), исто така се дел од разговорите“, соопшти УЕФА.

Дуелот помеѓу побдниците на двете натпреварувања под капата на УЕФА воедно претставува и старт на новата сезона во европските купови.

Шефот на кабинетот на унгарскиот премиер Виктор Орбан, Гергељи Гулаш, минатата недела изјави навивачите ќе можат да влезат во државата со два негативни ПЦР тестови и тие ќе бидат однесени директно на стадион, а потоа и на аеродром.

УЕФА од друга страна објави дека Суперкупот ќе биде првиот натпревар на кој ќе присуствуваат навивачи, и тоа највеќе до 30 проценти од капацитетот на стадионот „Ференц Пушкаш“ кој изнесува 67.215 седишта.