Украина предупреди дека размислува да се стекне со нуклеарно оружје за да ја зајакне својата воена позиција во конфронтацијата со Русија, ако НАТО не го прифати нејзиното барање за членство во западниот сојуз, јави ДПА.

– Или сме дел од сојуз како НАТО и исто така даваме свој придонес за зајакнување на оваа Европа, или имаме само една опција; да се вооружиме, рече украинскиот амбасадор во Германија Андриј Мелник

Зборувајќи за националното јавно радио Дојчландфунк, Мелник ја посочи можноста поранешната советска република да се обиде да набави нуклеарно оружје и средства за таа намена, од што се откажа по распадот на Советскиот сојуз во 1991 година.

– Како поинаку би можеле да ја гарантираме нашата одбрана? – праша Мелник.

Украина некогаш го поседуваше третиот по големина нуклеарен арсенал во светот, но се разоружа во 1994 година откако доби безбедносни гаранции од САД, Русија и Велика Британија.

Украина со години се обидува да започне пристапни разговори со НАТО, но секојпат досега беше одбиена. Ова прашање стана итно откако во поселеден период Русија почна да трупа војска долж границата со Украина.