ОБНОВЕНО: Татко и 8-годишно дете застрелани одблизу во автомобил кај Слупчане
Полициски службеници од полициското одделение Матејче, синоќа во 22:40 часот во атар на с.Слупчане, на место викано Слупчански бунар, пронашле патничко возило „опел астра“ со скопски регистарски ознаки во кое билe две лица без знаци на живот.
Јавен обвинител и екипа од СВР Куманово излегле на местото и било констатирано дека непознат сторител со огнено оружје пукал во Е.С.(47) и неговиот деветгодишен син, двајцата од с.Опае.По наредба на Јавен обвинител, телата на починатите се дадени за обдукција во Институтот за судска медицина и криминалистика Скопје.
Основното јавно обвинителство Куманово изврши увид при што било констатирано дека од близина е пукано во патничкото моторно возило во кое се наоѓале две лица, возач и неговото осумгодишно дете.
Двете лица биле смртно повредени и починале на лице место.По насока на надлежен јавен обвинител, увидната екипа на Министерството за внатрешни работи ги обезбеди и подигна трагите од лице место и истите ќе бидат предмет на натамошно вештачење.
„Пронајдени се и подигнати поголем број испукани чаури преку чие вештачење се очекува да се утврдат битни факти во предметот. Ќе биде извршено вештачење и на возилото на кое се видливи повеќе траги од напад со огнено оружје. Издадена е и наредба за вршење обдукција на телата на починатите.Основното јавно обвинителство Куманово во континуитет презема дејствија со цел целосно расчистување на настанот“, се вели во соопштението од ОЈО: