Страотната железничка несреќа која ја шокира Грција и регионот однесе повеќе од 40 животи, но низ црните вести се појави и објава на Фејсбук од лекарка од Универзитетската болница во Лариса, Ери Цијастуди.

Според докторката, 20-годишен студент бил вистинскиот херој по ужасниот судир на двата воза – тој сам успеал да го скрши стаклото од вагонот во кој се возел и да спаси најмалку десетмина млади луѓе.

Студентот Андреас Аликаниотис излегол речиси неповреден од вториот вагон и пркосејќи ѝ на опасноста од огромниот оган кој горел покрај него, бестрашно се впуштил во спасување, пишува „Прототема“.

„Иако денес небото беше исполнето со ангели, ние имаме среќа меѓу нас да имаме ангел на земјата, 20-годишниот студент Андреас Аликаниотис, кој излезе речиси неповреден од вториот вагон. Тој е херој затоа што ризикувајќи го својот живот, со огромен оган покрај него, не го напушти вагонот сам, туку самиот успеа да го скрши стаклото и да спаси уште најмалку десетина деца, момчиња и девојчиња. Во денешниот мрачен ден Андреас ни покажа дека новата генерација Грци има добрина, принципи и морал! Честитки за мојот убав Андреас, честитки за родителите кои те воспитале!“, пишува лекарката во објавата.