Стил на неделата: Лидија Георгиева, модна дизајнерка
Силвија Михајловска – Алшар, модна дизајнерка за „Женски печат“ одбра стил на неделата, а според неа тоа е нејзината колешка, модната дизајнерка Лидија Георгиева.
– Лидија Георгиева, една од моите омилени колешки, ме освои „од прва“ не само поради нејзините прекрасни колекции и богато и импресивно работно портфолио, туку и поради нејзината непосредност во комуникацијата и острината и страста за работата што и двете ја работиме. Како припадничка на супкултурата во осумдесеттите, дополнително ги освои моите симпатии! Остра и бескомпромисна кога зазема став, но истовремено бескрајно нежна во нејзините креации, создавач на соништа, романтична и префината во секое парче што го создава.
Креациите се со карактеристична силуета од дваесеттите години, а нејзин личен печат се рачно везени и плетени детали што ги користи и како мотив во своите принтови имплементирани на парчиња облека и луксузни предмети за домот. Вонреден талент кој добива француска стипендија да студира моден дизајн во Париз, по препорака од Кристијан Лакруа, а своето знаење го надоградува со работа во познати француски модни куќи, како асисент во Балман, во Рошас и други. Во 1999 година создава сопствен бренд што се продава во Франција, Англија, САД, Јапонија, и кој го носат многу познати личности, меѓу кои и Мадона! Исклучителни постигнувања со кои не може да се пофали ниеден македонски дизајнер. Магистрирала на Факултетот за ликовни уметности, област графика. Тоа што дополнително ме воодушевува е што таа е посветен професор, предава на Технолошко-металуршкиот факултет, им пренесува огромно знаење на своите студенти и истовремено работи на уште многу други проекти, костими за многу театарски претстави, модерен танц, филм и дизајн на предмети за внатрешно уредување, вели Силвија Михајловска – Алшар, модна дизајнерка.