Градоначалничката Данела Арсовска и понатаму останува „глува“ и недостапна за преставниците на работниците, знаејќи дека в.д директорот на ЈП „Водовод и канализација“, е лице осудувано со правосилни судски пресуди за кривични дела, затворска казна и дијагноза од психијатар, па затоа од денеска што и да се случи во претпријатието, вината и одговорноста ќе биде на градоначалничката Данела Арсовска.

Ова е ставот на репрезентативниот синдикат за комунални дејности СУТКОЗ при ССМ , од каде бараат итна и неодложна седница на Советот на Град Скопје, а од советниците помош и заштита од сериозната состојба во која се наоѓа ова јавно претпријатие.

Затоа, уште денес писмено му се обраќаме и го повикуваме претседавачот на Советот Трајко Славевски да свика итна седница на Советот на градот Скопје и да обезбеди присуство на градоначалничката Данела Арсовска како и присуство на сите советници – се вели во соопштението од Синдикатот.

Оттаму додаваат дека претседателството на СУТКОЗ денес во 13 часот одржува седница на која со сигурност ќе биде потврдена Одлуката за штрајк во ЈП „Водовод и канализација“, а уште утре  ќе бидат известени Министерството за труд и социјална политика за определување лиценциран помирувач согласно Законот за мирно решавање на работните спорови, а писмено предупредување ќе биде доставено до Управниот одбор и в.д директорот на ЈП „Водовод и канализација“, Советот на Град Скопје и градоначалничката Данела Арсовска .