Сливите се суперздрави, но кои луѓе треба да ги јадат во мали количества?
Постојат над 2.000 видови сливи настанати со вкрстување, со различни големини, вкусови и со разни бои и нијанси од сина, зелена, бела, жолта, црвена до портокалова.
Освен специфичниот вкус, сливата содржи и бројни лековити својства кои наоѓаат примена кај гихт, болести на црниот дроб и појава на ревма. Сливата, исто така, поволно дејствува и на дигестивниот тракт, односно помага во работењето на органите за варење, регулирајќи ја функцијата на цревата.
Ова драгоцено овошје е богато со витамини и со минерали, а особено со витамините А и Ц, рибофлавин, калциум и магнезиум. Сливата има медицинско значење благодарение на своето умерено и природно лаксативно дејство, кое може да се искористи кај случаите на запек, особено кај малите деца и кај старите луѓе. Освен тоа, истражувањата поврзани со антиоксидативните и со антиканцерогените својства на овошјето, покажале дека сувите сливи се меѓу најбогатите плодови, не само меѓу овошјето, туку и меѓу зеленчукот со такви својства.
Сливите ги чистат крвните садови од масни наслаги и дејствуваат како моќен антиоксидант во борбата против слободните радикали. Антоцијаните – кои всушност се црвеникаво-синиот пигмент во сливите – можат да помогнат во отстранувањето на штетните слободни радикали. Ова, пак, го штити вашето тело од рак и оштетување на клетките.
Витаминот Ц кој се наоѓа во сливите му помага на вашето тело да изгради мускули, да формира крвни садови, да се опорави, а исто така е корисен и за вашите очи. Според една студија од 2010 година, учесниците кои пиеле сок од сливи и јаделе сливи имале понизок крвен притисок од контролната група која не консумирала сливи.
Свежите и сушените сливи, како и компотот од сливи можат да се користат како диуретик.
Лицата што имаат проблеми со бубрезите или имаат болки во жолчката, треба да консумираат сливи во мали количества.