Холандската влада ја презеде контролата врз кинески производител на чипови, што може да има сериозни последици за Фолксваген. Според извештај на Билд, производителот на автомобили Фолксваген се подготвува за евентуално прекинување на производството на клучни модели поради недостиг на полупроводници, предизвикан од спор околу холандскиот производител на чипови Некспериа.

Производството на „голф“ во неговата главна фабрика во Волфсбург наводно би можело да биде прекинато веќе следната недела, а набрзо потоа и на теренецот „тигуан“. Според информациите од секторот за снабдување, Фолксваген сè уште има доволно материјал за оваа недела за да продолжи со производството, но ситуацијата за следната недела е неизвесна. Претставници на концернот веќе контактирале со службата за вработување за да побараат воведување на скратено работно време за некои вработени. Ова првично би влијаело на неколку илјади работници, а подоцна можеби на десетици илјади. Според портпаролот, во петок, 24 октомври, производството на моделите „голф“ и „тигуан“ во Волфсбург ќе биде привремено суспендирано поради залихи.

Производството треба да продолжи на почетокот на следната недела. Портпаролот нагласи дека застојот не е поврзан со недостаток на делови. Тој додаде дека Некспериа не е директен снабдувач на Фолксваген, но некои од деловите на компанијата се вградени во компоненти што Фолксваген ги набавува преку своите добавувачи. Производството во моментов се одвива непречено. Позадината на проблемот е трговскиот конфликт меѓу Кина и Холандија. Претседателката на Германското здружение на автомобилската индустрија, Хилдегард Милер, изјави дека ситуацијата наскоро би можела да доведе до сериозни ограничувања на производството, па дури и до целосно запирање, доколку прекинот во снабдувањето со чипови не се реши брзо, пренесува Феникс магазин.