Миш-машот на нашите простори е најпознат како „коктел“ во две бои од газиран сок од портокал и црвено вино, но Бугарите го служат своето миш-маш во чинија. Станува збор за кајагана во која најчесто се ставаат пиперки, домати, кромид, лук, магдонос и бугарска фета.

Кога станува збор за пиперките, можете да користите свежа бабура или печена пиперка, а наместо фета, Бугарите понекогаш ја сервираат кајаганата со шопска салата. Ако сакате, можете да го изоставите доматот и да комбинирате со билки како копар и мајчина душица.

Состојки:

3 свежи или печени пиперки
3 домати
1 главица кромид
2 чешниња лук
350 г фета сирење
5 јајца
2 лажици сечкан магдонос
сол, бибер, масло

Подготовка:

Кромидот, лукот и магдоносот ситно исечкајте ги. Исечете ја пиперката. Излупете ги доматите, па исечкајте ги. Јајцата се матат и се рони фета сирењето.

Во голема, тешка тава, загрејте го маслото на средно-висок оган. Прво додадете го кромидот и пропржете неколку минути, а потоа додадете ја пиперката и промешајте и пржете околу 5 минути.

Додадете лук и домати, измешајте и пржете 5 до 7 минути. Додадете ја искршената фета и измешајте. Истурете ги јајцата. Мешајте повремено. На крај додадете го магдоносот и пржете една минута пред да го тргнете од оган. Послужете го топло.