Кинеските власти завчера почнаа програма за објавување здравствени сертификати за патувања на домашни дестинации, што практично е првиот случај во светот на долгонајавуваните „ковид-пасоши“.

На дигиталниот сертификат, кој лицата може да го чуваат во своите смартфони, се запишани податоци за статусот на вакцинација за ковид-19, како и резултати од тестови за присуство на коронавирус во организмот. Апликацијата ја следи локацијата на корисникот и при проверка дава „зелен сигнал“ ако тој немал блиски контакти со заразено лице или ако не патувал на место каде што е проширен вирусот.

Апликацијата може да ја симнат корисниците на социјалната платформа „Вичет“, но сертификатот ќе биде достапен и во хартиена форма. Може да го добијат само кинески државјани и не е обврзувачки. Кина речиси цела година наназад строго го ограничува пристигнувањето на патници од странство, а оние на кои им е дозволен влез задолжително мора да поминат две недели во строга изолација.

– Сертификатот е достапен за да помогне аз промоција на светската економска обнова и да се овозможат патувања преку граници, објави Министерството за надворешни работи.

САД и Обединетото Кралство веќе ја разгледуваат можноста за воведување слични сертификати, а претседателката на Европската комисија, Урсула фон дер Лајен најави дека на 17 март ќе ја претстави идејата за „зелена пропусница“, која на жителите на Европската Унија би им овозможила да патуваат преку границите на членките, но и надвор од Унијата.

Мајкл Рајан, шефот за вонредни операции при Светската здравствена организација, завчера повтори дека ковид-пасоши не треба да се користат за меѓународни патувања, поради големиот број проблеми.

– Вакцинацијата не е достапна ширум светот и не е на фер основа, предупреди Рајан, истакнувајќи дека „стратегијата може да биде неправедна кон луѓето кои поради разни причини не можат да се вакцинираат“.