Сите 39 луѓе чии тела се најдени во камион во Есекс, во Англија, се државјани на Кина, пренесува „Скај Њуз“.

Жртвите, меѓу кои и еден тинејџер, се најдени во средата во индустрискиот парк Вотерглејд, во раните утрински часови.

Полицијата во текот на изминатата ноќ извршила претрес на две адреси во Северна Ирска, по наоѓањето на 39 тела во приколка од камион во индустриски парк во Есекс.

Се верува дека двата претреса во средата невечер се поврзани со апсењето на возачот, кој е идентификуван како Мо Робинсон (25) од Северна Ирска. Тој бил приведен веднаш по откривањето на телата и бил испрашуван во врска со убиствата.

Како што пренесуваат светските медиуми, температурата во приколката во камионот, каде се наоѓале жртвите, можела да биде и до минус 25 степени, поради што се претпоставува дека смрзнале до смрт.