Португалија бара селектор, Мурињо молчи
Жозе Мурињо со фудбалерите на Рома пристигна во Фаро, Португалија на мини-подготовките пред да продолжи актуелната сезона од јануари, но стратегот на „волчицата“ одби да одговори дали ќе го наследи Фернандо Сантош на клупата на националната репрезентација после отказот што досегашниот селектор го доби.
Мурињо се споменува како прва опција на федерацијата, која дури и е подготвена да исполни еден услов, „специјалниот“ да продолжи да ја теренира Рома и паралелно да работи со селекцијата, но нејасно е дали римјаните би се согласиле на такво нешто.
Новинарите го сочекаа Мурињо во Фаро, со подготвени прашања, но тој освен што се смешкаше, не кажа ништо. Во португалските медиуми се вртат две верзии, првата да работи паралелно и како селектор и како тренер на Рома, а втората е дека ќе чекаат до крај на сезоната за да му дадат (пре)богата понуда. Дотогаш во првиот дел од 2023 година и низ две рунди на евроквалификации за ЕП 2024 во Германија, привремен селектор би бил Руи Жорге, актуелниот кормилар на младата репрезентација.
Мурињо со Рома има договор до 2024 година, а во мај годинава го донесе првиот европски трофеј по шест децении. „Специјалниот“ никогаш не би селектор, а беше тренер на Порто, Челси, Тотнем, Интер, Манчестер јунајтед, Реал Мадрид, а беше и помошник на Боби Робсон во Барселона во сезоната 1996/97.
Сантош вчера беше сменет на година ипол пред истекот на договорот после осум години на кормилото поради неуспехот на СП во Катар со испаѓањето во четвртфиналето, а во 2016 година ја донесе европската титула, најголемиот трофеј што Португалија го освои во историјата, како и првиот во Лигата на нации во 2019 година.