Пораз на МЗТ Скопје од Хелиос, Хиндс трагичар
МЗТ Скопје го доживеа вториот пораз во АБА2-лигата, откако на гостувањето во Словенија кај Хелиос загуби со 78:76. На крајот исходот можеше да биде и поинаков доколку кошаркарот на „металците“ Џабари Хиндс не го промашеше шутот во последните секудни.
Во првото полувреме, ниту една екипа не успеа да направи поголема предност, туку се играше израмнето, а тоа најдобро го покажува резултатот од првиот четвртина (24:24) и од полувремето (43:43).
Првиот удар го зададе словенечкиот тим кој третата четвртина ја реши во своја корист со 23:13. Сепак, „металците“ успеаја да ја вратат резултатската неизвесност и рамнотежа преку капитенот Дамјан Стојановски и Хиндс.
Во последната минута, Стојаносвски донесе водство за МЗТ Скопје од 75:76, но Хелиос во следниот напад го врати водството. Меч топката за избраниците на тренерот Кочов не ја искористи Хиндс по што МЗТ Скопје го доживеа вториот пораз во АБА2-лигата.
Токму трагичарот Хиндс беше најефикасен со 29 поени, додека Стојановски постигна 15 поени.
Нареден противник на МЗТ Скопје во АБА2-лигата е тимот на Широки Бријег, а натпреварот се игра во СЦ „Јане Сандански“ на 21 ноември.