Поради недостаток на средства, ОН го намалува снабдувањето со храна во Јемен
Светската програма за храна (ВФП) денеска објави дека од јануари ја намалува храната за 8 милиони луѓе во Јемен поради недостиг на средства.
Семејствата погодени од мерката сега ќе добиваат едвај половина од минималниот дневен оброк.
ВФП предупредува дека другите програми за храна и помош за деца може да бидат „скратени“, пишува Франс24.
Агенциите на Обединетите нации, вклучително и ВФП, претходно предупредија за можни кратења откако добија 2,68 милијарди долари од побараните 3,85 милијарди долари од донаторите до крајот на октомври.
„Залихите на храна на ВФП во Јемен опасно се намалуваат“, рече регионалниот директор Корин Флечер. „Секогаш кога ќе ја намалиме количината на храна, знаеме дека уште повеќе луѓе кои веќе се гладни ќе им се придружат на милионите кои гладуваат. Но, очајните времиња бараат очајни мерки.
Програмата за храна, сепак, наведува дека пет милиони луѓе кои се во непосредна опасност од глад нема да останат без целосен оброк.
Агенцијата во Јемен храни 13 милиони луѓе месечно, а гладот во таа земја беше предизвикан од седумгодишната војна, инфлацијата и пречките за увоз.