Градското осветлување во важни згради и цркви во 100 градови низ Полска беше исклучено во времетрање од три часа, како знак на протест на локалните власти против намалувањето на средствата од даноците и против ветото на владата на премиерот Матеуш Моравиецки за новиот повеќегодишен буџет на ЕУ.

Полска го блокира новиот буџет на ЕУ затоа што одбива средства од европски фондови да бидат поврзани за имплементирање на владеењето на правото.

Протестот наречен „Останавме само со темнина“ беше инициран од здружението „Да! Самоуправа за Полска“, предводено од опозицискиот градоначалник на Сопот, Јацек Карновски, бидејќи владејачката партија Закон и правда го протурка законот за намалување учеството на локалните самоуправи во пари од данок.

„Во градовите низ Полска, симболично се исклучуваат светлата на протестот против растечката финансиска репресија на локалните буџети од страна на владата“, напиша на Твитер опозицискиот градоначалник на Варшава, Рафал Цашковски, кој ги исклучи светлата на некои мостови над Висла.

Друга причина за денешниот протест е ветото со кое се заканува владата на премиерот Матеуш Моравиецки, заедно со унгарскиот премиер Виктор Орбан, а е поврзано со новиот повеќегодишен буџет на Европската унија и како и со Фондот за обновување на солидарноста за санирање на последиците од пандемијата Ковид-19.

„Во текот на последните децении, средствата и помошта од ЕУ беа еден вид инфузија за нашата земја која даде живот и во исто време спектакуларно ги смени стандардот и квалитетот на тој живот. Вака излегува дека ние сами сакаме да ја извлечеме иглата за инфузија и да ја фрлиме во ѓубре “, предупредија претставниците на локалната самоуправа од полските градови.

Синоќа во Варшава, полскиот премиер Матеуш Моравиецки и унгарскиот премиер Виктор Орбан координираа заеднички тактики што би спречиле исплатата на средствата од ЕУ фодовите да биде директно поврзано со владеењeто на правото во земјите – членки на Унијата.