Почна меѓувладиното заседание, Петков и Ковачевски очекуваат напредок
Меѓувладината конференција во резиденцијата Бојана во бугарската престолнина се очекува да помине во конструктивна атмосфера како што најавија двајцата премиери Димитар Ковачевски и Кирил Петков.
Бугарскиот премиер Петков истакна дека билатералните односи ќе се темелат врз вистинска работа, вистнски средби и вистински резултати.
-Порано односите беа на многу ниско ниво, но сега имам големи надежи бидејќи се вклучени многу министри со кои заедно сакаме да работиме. Најважно во политиката е да работиме за доброто на двата народи. Да работиме на прашања од економијата, инфраструктурата, европската интеграција и се разбира да ги следиме внимателно и општите теми како историјата, образованието човековите права, рече Петков.
Премиерот Ковачевски истaкна дека ова е успех во односите со Бугарија зошто само по една недела договорено е подобрување на економската соработка, инфраструктурното поврзување и постои политичка волја за реализирање на она што е зацртано.
-Договоривме работа на Kоридорот 8, целосна патна, железничка и телекомуникациска инфраструкура, потоа соработка во образованието, културна размена и економска соработка. Во работните групи нема да членуваат само министри, туку и претставници од бизнис заедницата како и експерти од разни области, а редовно ќе не информираат за напредокот кој е постигнат, рече Ковачевски.
По овие куси обраќања двете влади продолжија со работа на агендата зад затворени врати.
По заминувањето на македнската делегација, бугарскиот премиер Петков и министрите ќе се посветат на ургентната криза во односите меѓу НАТО и Русија, во која Бугарија како членка на Алијансата треба да има свој удел.