Ракометарите на Вардар денеска (16 ч.) ќе го одиграат првиот од двата дуели со екипата на Елверум во Скопје во рамки на Лигата на шампионите.

Норвешкиот тим се согласи двата натпревари со „црвено-црните“ да ги одигра во Скопје, првиот денеска, а вториот ќе се игра во среда.

Победата е единствена опција на вардарци кои така би ја прекинале серијата од три порази по ред (Порто и два пати од Пик Сегед), а во исто време би ја подобриле позицијата на табелата. Вардар моментно е последен во групата А со три бода од осум натпревари, а Елверум е едно место погоди со бод повеќе и натпревар повеќе.

-Не очекува една пеколна недела. Ќе треба да одиграме четири натпревари, два од Лигата на шампионите, една од СЕХА лигата и еден од домашниот куп. Ќе одиме меч по меч. Одигравме два меча со Сегед на кои бевме блиску, но не успеавме да победиме. Сега мора да гледаме напред и на мечот со Елверум кој не очекува. Тоа е тим кој не е наивен, не смееме во никој случај да ги потцениме. Гледваме видео, анализиравме каква е нивната одбрана. Тоа е квалитетна одбрана, многу слична на таа скандинавска школа, со многу контакт и густина. Но можеме и знаеме како да нападнеме. По оние два малку и несреќни порази се надевам дека ќе се радуваме. Шансите за успех се многу поголеми отколку на мечевите со Сегед – вели тренерот на Вардар, Стевче Алушовски.