Добро е што надлежните конечно признаа дека постои висок степен на смртност од ковид-19 во земјава, но мора да се направи издржана анализа која ќе покаже зошто е тоа така и да се преземат мерки околу надминување на проблемите, вели во изјава за Слободен печат, проф. д-р Никола Пановски.

– Мора да има некој кој ќе биде одговорен за лекувањето на пациентите во сите ковид-центри, тоа да се прави по исти протоколи и на неделно ниво да се споредуваат податоците за да се види каде какви резултати има. Со тоа ќе се унапреди третманот и ќе се постигнат подобри резултати во лекувањето – вели Пановски.

Тој додава дека треба добро да се провери и со какви дијагностички процедури располагаат и ковид-центрите кои беа отворени во другите градови во земјава, бидејќи случајно или не, смртноста кај пациентите со ковид-19 забрзано почна да расте откако почна децентрализацијата на болните.

– Има мали држави во светот кои покажуваат одлични резултати во лекувањето на пациентите со ковид-19. Искуствата кои се презентираат покажуваат дека лекување со дексаметазон за една третина ги намалува смртните случаи, исто така од голема помош се и препаратите против коагулација на крвта, кои се евтини и достапни. Како кај нас се лекуваат пациентите, не се знае  – вели Пановски.

Вчера бројот на починати од Ковид 19 се искачи на 700, а по последната недела имаше 45 смртни случаи, што е за 28 почеќе во однос на таа пред неа.

Високата смртност од ковид-19 со сè уште непозната дијагноза