Пацоли до младите во Албанија и Косово: Имајте трпение зашто иднината подготвува изненадувања
Косовскиот вицепремиер и шеф на дипломатијата, во заминување, Беџет Пацоли од албанскиот приморски град Валона, упати порака до младите во Албанија и во Косово да имаат трпение „бидејќи ги чека посветла иднина”.
Оваа порака тој ја упати поради масовната миграција на младите во земјите на ЕУ, што веќе станува проблем и за двете земји.
– Јас сум крајно загрижен за заминувањето на нашите млади од Албанија и од Косово. Сакам да ви порачам да имате малку трпеливост, бидејќи иднината подготвува изненадувања, кои зборуваат за иднината на младите и иднината што тие мора да ја најдат тука, порача Пацоли, кој присуствуваше на одбележувањето на 25-годишнината од формирањето на Универзитетот во Валона „Исмаил Ќемали”.
Според ректорот Роланд Зиси, Универзитетот во Валона е дел од 400 најуспешни универзитети во Европа. Според него тоа е заслуга на генерациите на декани, академици и професори.
Но, за разлика од другите академски години во некои универзитети во Албанија, вклучително и во Валона, некои студиски програми се затворени поради малиот број на студенти.